مجالس قبيلة زعب

مجالس قبيلة زعب (http://www.zaub.com/vb/index.php)
-   مجلس الشعر والشعراء (http://www.zaub.com/vb/forumdisplay.php?f=6)
-   -   مجاراة الشاعر سلطان العميم للشاعر ابراهيم الزعبي (http://www.zaub.com/vb/showthread.php?t=3093)

العبيدي 25th November 2005 18:26

مجاراة الشاعر سلطان العميم للشاعر ابراهيم الزعبي
 
الاخوان الافاضل

لقد كتب الشاعر سلطان بن عبدالله العميم قصيدة مجاراه لقصيدة الشاعر
ابراهيم فراج الزعبي رثاء الذات والتي سبق ان نشرت في هذا المجلس
وكما تعلمون ان قصائد المجاراه تكتب عندما يعجب الشاعر بقصيدة
شاعر آخر
واليكم القصيدتين للشاعرين الذين هم حقاً اغنياء عن التعريف

رثاء الذات

[poem font="Simplified Arabic,4,black,norma l,normal" bkcolor="transparent " bkimage="backgrounds/1.gif" border="none,4,gray" type=0 line=0 align=center use=ex num="0,black"]
في محكم التنزيل ربي ذكـر ليـل =وقال الولـي فالليـل ألكـم سباتـا
واليا دنا الاسحـار ذكـرٍ وتهليـل =وبعد الصلاة ارزاق ربـي شتاتـا
كلٍ على رزقه يبـي شـدة الحيـل =ميـر الحـذر لا تلتهـي بالحتاتـا
روح بها جيلٍ يوصي بهـا جيـل =جد وحفيـد وبيـن خذهـا وهاتـا
متسلسله من عصر يصهل به الخيل =عز العصور عصورنا الماضياتـا
وبّدل بهذا الوقت كل شـي تبديـل =وأعيني اللـي مـا تـذوق المباتـا
وصرنا مع الايام نجـري بتميـل =وفي كل يوم يصادق الذيب شاتـا
وقالوا تطور وانفتـاح و تساهيـل =والخير كله جاي لا . . لا تحاتـا
خل البني تسوق مثل الدريويـل =وتصبح كما الرجال وترمي العباتا
هذا سبب تقدم الغـرب يـا خبيـل =شوف الدشـوش وتابعـه بالقناتـا
ثم جابوا الشعلة لـروس المفاتيـل =يرجون عز والذل بارض الفراتـا
ترجي النجات وتعكس الدرب للميل =وفي ذمتي والميل ما هو نجاتـا؟؟
والعفن والخربان ضمن المحاصيل =من نبتته والصخر مـا لـه نباتـا
لي كلمتٍ لامن طوتنـي الغرابيـل =كلٍ يحسّب مـا بهـا مـن حداتـا
من لارتفع لو جاع يوطى بتذليـل =والموت ارحم من تدنـس خواتـا
ليتي تراب بحيث لا عال ولا عيل =من دون روح و فالصحاري هباتا
لا نايلن لي خير والشر مـا نيـل =لا لـي ولا ضـدي سجـلٍ بتاتـا
وش حيلتي لا من نصاني عزرائيل =مـن دون أذن وساقنـي للممـاتـا
ثم اطلعت روحي ولا فيـه تعليـل =وأصبحت جسمٍ ما يسـوي سواتـا
ثم اندهوا أهلـي لدكتـور تحليـل =آوخوفهـم وش جـاي بالمقبلاتـا
ثم قال والدكتور مرّتبْـك بالحيـل =الصبر للمؤمـن عظيـم الصفاتـا
ثم صاحت أمي من طوى كالمهابيل =وطاحت وضمتنـي وقلبـه فتاتـا
ثم جا لها مشهد حياتـي بتفصيـل =وتزداد حسرة لا حصل لي طراتـا
وكتبوا شهادة موت ليـه وتسجيـل =رحال ومفـارق و جتـه الوفاتـا
أمنولٍ حـرام كشـف السروايـل =واليوم بالواجب ونكشـف عراتـا
نكشف ولكن ليه من شان تغسيـل =مـن دون معّلـم مغسلـه للمواتـا
وصلوا علي صلاة عابر بترحيـل =ودموعهم تنزف بذيـك الصلاتـا
ثم ارفعوني أربعة بالنعـش شيـل =تارك حيـاة ومقبـلٍ لـي حياتـا
ثم اوضعوني بحفرةٍ موحشة حيـل =قفوا وانا اسمع مشيهـم والخطاتـا
والويل كل الويل والشمس بالميـل =ما به ذرا عنهـا ولا بـه غطاتـا
وجانا الحساب الحق بالصاع والكيل =نطق الجلود ونطق غصب الشفاتـا
وأنا دخيل مكلف الوحـي جبريـل =يعفـو ويدخلنـي لبـاب الصفاتـا [/poem]


مجاراة الشاعر سلطان العميم



[poem font="Simplified Arabic,4,black,norma l,normal" bkcolor="transparent " bkimage="backgrounds/1.gif" border="none,4,gray" type=0 line=0 align=center use=ex num="0,black"]
ياوقتنا اللي حط رأس الفتى ذيل = حتى القطامي ينفرس كالقطاتا
كل من بغى الطولات جته الحراويل = شفنا عيال اليوم مثل البناتا
يالله دخيلك من بلى كل تبديل = ويالله ترزقنا عظيم الغناتا
يامرسلٍ لطاغية طير أبابيل = يا خيرٍ يا محصي الكايناتا
يالله تكفينا بلى ذا البهاذيل= وعيوب هذا الوقت هن بيناتا
الوقت ورانا كبار الولاويل = وأيامنا في ذمتي خايناتا
من عذر أبو فراج لو طاول سهيل = دنياك يابراهيم ما به رجاتا
أبكي وتبكي وما تفيد الهماليل = وننوح نوح اللي غدن ساجعاتا
ياناس وقت اليوم كله غرابيل = روّح زمان العز والعادياتا
العز ولى كيف نلقى محاصيل = العز عز الدين إن كان فاتا
واليوم جونا ناس ماهم رجاجيل = تبغى تفسد منهج المحصناتا
تبغى الفتاه المسلمه تقرا الانجيل = ترمي غطاه وتتبع الزانياتا
يبونها تنسى دوام المعاميل = وتصير حره طلقةٍ كالحداتا
من وين حره والنبي وضح القيل = في ماضي الاجيال عبر الرواتا
قال النبي ان البني حفرة الجيل = بيوتهن خيرٍ لهن والغطاتا
واليوم في عصر التطور نبي نميل = لازم يخاوي الذيب للمترفاتا
ولازم تسوق البنت في شارع الريل = وتشوفها عيون التفق والرماتا
والبنت بنتٍ ما بها ضلع يشيل = ما هي كما الرجال تقوى العناتا
ولو صابها تعطيل باحدى الصواميل = تسكّر الجامه تخاف الجناتا
ثمٍ يجيها كل خاين بتنكيل = وان يفرح الخوان واهل الشماتا
وان تنتشر فوضى عقب تالي الليل = وان تضرع العنزات قبل المباتا
وانا ترى مانيب راعي تهاويل = ولا نيب اخزن تالي الليل قاتا
مير اطلب اللي وامرٍ ذا المخاييل = يميتني من قبل اشوف العراتا
ويارب ترحمني مع الشيخ هابيل = ولازارني الموت نبغى الثباتا
لا انفجعت امي واخوتي دمعهم سيل = انا اشهد ان ايامهم قاسياتا
وامي تكّسر قلبها كالفناجيل = وابوي طش عمامته والعباتا
وصاروا هلي مثل الذي بالمحابيل = وصاحوا علي عمومتي والخواتا
وشمّا تشقق جيبها كالمراميل = تقول راح صويحبي كيف ماتا
وطاحت على رجولي تحب العصاقيل = وكلٍ دعا ربه بحسن العزاتا
وصلوا علي عصير يبكون بالحيل = وعيال عمي دموعهم صافياتا
حتى صديقي دمعته فوقي تسيل = يقول يا سلطان مات النباتا
وشالوني لقبري كبار الحلاحيل = وعيون كل الناس بي شاخصاتا
وجابوا لي الطينه بها زود تبليل = ثم حطوا الطينه على اليابساتا
وقاموا يهلون الترايب مشاكيل = وكلٍ عظامه يرقلن خايفاتا
مالي رجا كود الولي هازم الفيل = يالله تمحو عني السيئاتا
ويوم الحشر تكفين شر المعاطيل = يوم ان خلقك مقبلينٍ حفاتا
احدٍ عليه ذنوب كبر الغراميل = واحدٍ عليه ذنوب كبر الصفاتا
واحدٍ عمايل خير فيهن تفاضيل = يالله فضل منك زود العطاتا
يالله بجنة خلد فيها مظاليل = من العطا ياغافرٍ الماضياتا
وختامها صلوا عدد حبة النيل = على نبي الله افضل صلاتا [/poem]

هاجوس 25th November 2005 22:04

صح الله لسان الشاعرين

وياعسانا من المتعضين

وعسى الله يغفر لنا

ابن عسكر 26th November 2005 03:46

عليه الصلاة والسلام


صح لساااان الشاعرين


وجزاك الله خير اخوي العبيدي على وضع هذه القصيده


تحياتي للجميع

العبيدي 26th November 2005 06:44

مشكــــــــــــــــو ر ياهاجوس

على مرورك

العبيدي 26th November 2005 06:45

ابن عســـــــــــــــكر


هلا وغلا

الف شـــــــــــــــــــ ــكر على مرورك

ذيب الحره 26th November 2005 08:31

اخوي العبيدي سلمت وسلمت يمينك


وصح لسان شعارها

العبيدي 26th November 2005 12:36

الغالي

ذيب الحره

مرحبا تراحيب المطر

لاعدمت تواجدك

ابوهلا 30th November 2005 02:06

الف شكر يالعبيدي


علي تزويدنا بهذه المجاراة الرائعه


وصح الله لسان الشاعر سلطان العميم



مجاراة جزله

محمد فهد الوافي 1st December 2005 01:00

الاخ العبيدي

















لاهنت على ما تقوم به من جهد لأيصال قصائد ذات جزالة وقوة معنى وخصوصا الشاعر الشاب القادم بقوة أبراهيم فراج بن أبراهيم




























ولاشك أن مجاراة الشاعر سلطان لا تقل عنها جزاله وجمال وقوة معنى




























صح لسان الشاعرين ولاهنت يالعبيدي على النقل


























دمت بود




















أخوك / محمد فهد الوافي

الفياض 2nd December 2005 05:07

شكرا للعبيدي الذي ينقل لنا هذه الروائع الجميله جدا وخصوصا من احد ابناء القبيلة ........


وننتظر الكثير والكثير من الشاعر ابراهيم بن فراج................ .................... ....................


الساعة الآن 16:45

Powered by vBulletin® Copyright ©2000 - 2024, Jelsoft Enterprises Ltd. TranZ By Almuhajir