[عبد ربه العتيبي]

السلام عليكم ،

ابيات تعبر عن موقف تعرضت له قبل فترة وتتضمن الشكر للأخ / سعود بن مدلاج الزعبي ...

" شاعر المحاورة الكبير .

والشكر لله سبحانه..

يقول فيها :ـ





ياسعود ياجعل الرخوم افداك ياعز الخوي

~~~~~~~~ اللي عليهم حدني وقتي وراحوا عنفتيت!



نصيتهم يوم الزمن بيداه يطويني طوي

~~~~~~~ مليون .. منهم في لزومي ربع واحد مالقيت



ياصدق من قال إن طيب أهل الردا بيض اصعوي

~~~~~~ وإن كان عني مادروا .. عنهم لك الله ما دريت



وألاّ أنت ياراع اليمين الطايلة جعلك قوي

~~~~ ساعة نخيتك .. قلت عان الجيب وألاّ اخذ الونيت!



بعد نصيتك عزمي المنهار .. عوّد معنوي

~~~~~~~~ ماخابت الهقوة بعد .. مافيك بالفزعة هقيت



ذلولي اللي من تحت رجلي ظهرها ملتوي!

~~~~~~~ يوم اقطعت بي قلت أنا خلاص يالربع انتهيت



وأقسمت بالله من بعد ما شفتها ما تستوي

~~~~~~~~ قلت المكينة خبّطت .. لازم توضّب كمبليت


الراس والكرتيل واللي للسلندر يحتوي

~~~~~~~ حمّلتها مع راعي السطحة .. وأنا معها مشيت



سوّاقها يضحك .. وأنا بالباب الأيمن منطوي

~~~~~~~ والله وأعلم لو نشدني وش محاصيلي ؟ بكيت!



قال أنت واجد شيخ أظنّك سيم سيم ابن اجلوي!

~~~~~~~ أغترّ فـ الكشخة ما يدرِي إنّي سبيت بدون بيت!



وأنا أحمد الله دام جسمي بالعوافي مرتوي

~~~~~~ لو كان مرة .. ما جرت هوج الرياح بما اشتهيت



هانت بفضل اللي قوا عبده .. وهو ما ينقوي

~~~ من يوم صارت خرط راس .. وطقم بلف .. وقازقيت!!



لكن بعد هاذي نويت أبطش بها بطش ابدوي

~~~~~~ ما دام منّي ما استحت .. تراي منها .. ما استحيت



ما نيب قانيها ولا تصلح لمثلي .. مقنوي

~~~~~~~~ باللي سرق ربعه نويت أبيعها .. لو ما شريت



وختام هرجي ياخويٍّ ما طلع مثله خوي

~~~~~~~~ شكراً يابن مدلاج يوم إنّك وفيت .. ولا هفيت


وسلمتوا جميعاً .