شليويح والثبيتي

[الكاشف]

محاورة بين الشاعرين: مطلق بن حمّيد الثبيتي و شليويح بن شلاح المطيري



مطلق :
قمت ترسل فالسواليف لين ادوخت راسي

يا المطيري جيتنا ثم فرقت الجماعه

كان ابعطيك الذهب صايغه بفصوص ماسي

لو تريض لي وتسمع علومي ربع ساعه

شليويح :
لا تغيرك الروابع وخل القلب راسي
المطيري ما يخون الأمانه والوداعه

بيننا رفقه وعلمٍ نقيسه بالقياسي
لو يجوع الذيب فالبر ما ياكل ذراعه



مطلق : وأثر خشمك هضبةٍ ما يواسيها المواسي*** كل ما لديت فيّه يصيب القلب راعه

كل جنديٍ يدوس له دربٍ ما يداسي *** جيشكم ما عاد نعرف هجومه من دفاعه


شليويح:
الطعام اللي تلوث يبين بالتباسي*** يا ثبيتي ليت عندك عن الحمى مناعه
مرتكي له جوف غرفه ولا عنده كراسي *** المذيع اللي يسولف بنشرات الاذاعه


مطلق :
باتت الأجواد واما أنت جاي لك حساسي *** ترضع الخلفه لحالك وطغتك الرضاعه
صار شاطر مثلكم فالصرام وفالدياسي *** كل هندي فوق شط البحر باني شراعه


شليويح :
تشرب الطاسه لحالك وحاديك الحماسي*** درّها في جوف بطنك ولا عقبك طماعه
لو قلنا ناسي الدين وأنك ما انت ناسي *** وأنت رجلٍ شافعي مير ضيعت الشفاعه


مطلق :
لو بسطنا بالذهب عندكم يرجع نحاسي*** مانبي يا قوم من سوقكم شريه وباعه
قبل تصحي بك عيونٍ مطاولها النعاسي *** يالخزاعي طيع شوري وعود مع خزاعه

وسلامتكم.