مجالس قبيلة زعب  

العودة   مجالس قبيلة زعب > المجالس الأدبية > مجلس القصص

 
 
أدوات الموضوع انواع عرض الموضوع
قديم 9th June 2003, 19:28   #1
زعبي-كويتي
عضــــو
 
تاريخ التسجيل: May 2003
المشاركات: 12
قصة المهادي(ارحلو ولا رحلنا

السلام عليكم
هذي قصة لفارس معروف وشهم وشجاع وكل صفاة الرجولة الصحيحه فيه...يقاله "المهادي"..كان شاب وقلبه شباب ,وفي يوم من الايام راد هو وربعه من غزوه..واهم بطريقهم لديرتهم, وقفوا يشربون الماء قريب من قوم غير ربعهم وكان فيه بنات ياردن الماء ..المهادي شاف وحده وقلبه تولع فيها من جمالها...قال حق ربعه روحو وانا الحقكم..ولح عليهم انهم يروحون من دونه لانه عقيد قومه...دخل المهادي على شيخ هالعرب وكان اسمه على ما اضن مفرج..مفرج كذلك شهم وفارس وشيخ جماعته...ضيّف المهادي واكرمه..وعقب ثلاث ايام ...
قال مفرج فيما معناه: جان عندك حاجتن اقضيها علمنا وانا حاضر
قال المهادي: ودي ولله اتزوج من بناتكم
قال مفرج:ابرك الساعات..منهي البنت؟
قال المهادي: ما اعلم من بنته ولا اعرف اسمها..انا شفتها مع البنات تارد الماء
قال مفرج: امش واشر لي عليها..البنات راحن ياردن الماء الحين
المهم عرفها مفرج وزوجها للمهادي..بليلة العرس قامت البنت تبكي
قالها المهادي: علامج يا بنت..عسى ماني ناقص ولا فيني عيب وماجوز لج؟
قالت البنت: لابالله ونعم الرجال..لكن انت تزوجتني وانا محيّره لولد عمي..
قالها: ومنهو ولد عمج؟
قالت: مفرج
انصدم المهادي...قال في نفسه: لا بالله غلبني بطيبه ولله ونعم الرجال
قال المهادي لها: يابنت ارقدي والصبح نعيّن خير
يوم جا الصبح..دخل المهادي على مفرج ومعاه البنت ..مدح مفرج وطلق البنت ..تزوج مفرج من البنت وحضر زواجهم..ثاني يوم قال المهادي (فيما معناه) اني كسبتك اخو وانا برجع لقومي, اذا استضقت ولا بغيت حاجه تعالي وما لك الا اللي يسرك...
رد المهادي لديرته وتزوج وجاب بنت..مفرج صار عنده ثلاث اعيال ...مرت السنين وتغيرت الاحوال...قوم مفرج تضايقو من قلة العشب والقحط ..قالت مرة مفرج: ياشيخ قومك تضايقو..وش الدبره..قال : ولله ماني عارف وشسوي...قالت: تذكر الرجال اللي قالك لاتضايقت تعال, رحله يمكن تنحل امورنا...راح مفرج للمهادي ورحب فيه المهادي واكرمه وعرف مشكلته..قال المهادي لمفرج: تعال انت وقومك ونزلو عندنا.....راح مفرج لجماعته وجابهم وانزلو عند المهادي وتكونت علاقه طيبه وصار المهادي رفيج مفرج..كانو يسهرون مع بعض ويتسلون بلعبة مثل الدامه (الدومنه) اللي تكون على شكل مربعات مثل الشطرنج ولكن حركاتها في ثلاث اتجاهات ( قدام او يمين او يسار) ...وعقب ما جا الربيع كان مفرج يطلب من المهادي يرخص له ولجماعته انهم يردون لديارهم وكان المهادي يرفض...وبين كل فتره كان مفرج يطلب هالطلب والمهادي يرفض ...المراد عقب كم سنه قامت بنت المهادي تشتكي لامها من ولد مفرج , لانه يتحرش فيها دايم...و ولد مفرج كان حول وشكله قبيح وفاصخ الحيا..البنت تشتكي لامها من هالولد..والام تقول: يابنت اصبري اصبري..وقامت اشتكت البنت لامها مره ثالثه لان الوضع زاد عن حده..قالت الام : ابعلم ابوج يمكن انه يوقفه عند حده..يوم درا المهادي..قال: يا بنتي اصبري انشالله يعقل..وعقبها بفترة جت البنت وقالت لبوها: ترا ان ماوقفته وفكيتني من الحول..تراني بستسلم له..
المهادي ابتلش مهو عارف شسوي وطفح الكيل عنده...وبيوم من الايام واهو يلعب الدامه مع مفرج..كان المهادي في كل تحريكة للحصا يقول: ارحل..ولا رحلنا...قام يضحك مفرج ويكمل اللعب لانه يحسبه يضحك باللعب...المهادي قام يكثر من هالكلمه: ارحل ولا رحلنا..طبعا باللعب مثل قولة (كش..بالدامه..طبعا بالكويتي) وعقبها قام يقول المهادي باللعب..شد ولا شدينا..ارحل ولا رحلنا....مفرج شاف المهادي ماهو صاحبة الاولي وبليلة من الليالي واهو يكلم مرته (اقصد مفرج ) قال لمرته: المهادي ماهو على طبعه مدري علامه..قالت مرته: ليه وش فيه..قالها: طبعه وترحيبة لي ماهو مثل اول..واللي محيرني انه لي لعبنا يقولي: ارحلو ولا رحلنا..قالت: شف يا مفرج..رح قله انك تبيه يرخصلنا ان نرد لديرتنا..جانه رفض فالمهادي مافيه شي..وان جانه ما رفض فلازم في سبب.
راح مفرج وقال للمهادي: نبيك ترخصلنا ياطويل العمر انا نرد لديرتنا انا وجماعتي..قال المهادي: دربكم سمح وياهلا ويامرحبا فيكم...طلع مفرج لمرته
قالها : ما رفض..وش ضنج
قالت : مرة المهادي وبنتها مالي علم فيهم..يجوز احد من اعيالك مضايق بنتهم
قام مفرج ونادا عياله واحد واحد..قال للاول: هاه يولدي عساك طرحت بنت المهادي المزيونه..ادري بك شاعر وفارس ..عساك غازلتها؟
قال الولد واهو معصب فيما معناه: لا بالله ماهو طبعي ..افا , ماني من دني نفس
قام مفرج ونادا الثاني وقاله نفس الكلام..ورد الولد نفس كلام اخوه الاول..
عقبها نادا الحول وقاله: اكيد انت يا شيخ الشباب اللي طرحت بنت المهادي
قال الحول: ولله لو انك ناطر يومين كان يمديني ركبتها
فز مفرج من مقعده وطيّر راس ولده ( ذبحه)..وارسل راس الولد للمهادي واعتذر منه لانه ماكان يعلم باللي صار.
وقالو قصيده طويله بهالقصه ومذكور فيها اسم المهادي ومذكور فيها كلمته( ارحل ولا رحلنا) ولكني ما اعرفها..ارجوا منكم السموحه:)
زعبي-كويتي غير متواجد حالياً   رد مع اقتباس
 


الذين يشاهدون محتوى الموضوع الآن : 1 ( الأعضاء 0 والزوار 1)
 
أدوات الموضوع
انواع عرض الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة

الانتقال السريع


الساعة الآن 09:10


Powered by vBulletin® Copyright ©2000 - 2024, Jelsoft Enterprises Ltd. TranZ By Almuhajir